幾時先會有晴天？

有一次行老銅見到agnes b餐廳，未知餐牌價錢，就咁睇個格局同入面既食客類型，已經感到遙不可及。又一城新店唔知係點樣呢，價錢若親民一點也不妨一試。

今日大家返工有冇淋親呢？
勁大雨呀。一落車企o係車站，望住從天而降既洪水，手中得把超自私縮骨遮，我唔敢行住。
d雨真係勁過屋企個花灑，我懷疑就咁企o係條街淋雨會有按摩功效。
等左一陣，雨水都好似開水喉咁係咁落極唔停，但已經遲大到，局住都要走。
一行出車站，d雨霹靂拍勒咁擊打我把自私遮，我feel到每一滴雨所帶既衝力…
無定向既風雨好似四面八方衝擊，唔洗1分鐘我條腰對落以下已經淋濕晒。
好彩今日著裙，如果著褲就死啦。
而平底鞋就裝滿水，一路行，d雨水係咁入、而又隨住我既步伐滲返出黎。
哈哈，感覺真係好核突又好搞笑。

返到公司第一時間衝入廁所整返乾對鞋，透乾個身。
呢個時候，我見我對面既同事竟然連頭髮都濕埋，以為佢冇帶遮返工。
誰不知原來佢係有擔遮的，只係途中俾路過既巴士濺起既一個"白頭浪"冚埋黎…
哈，我今日似"洗腳"姐，佢仲沖埋涼。